كريم وليلي
عمري ما اتحطيت في الموقف ده في حياتي
أكتشفت أني نسيت أجيب الاوردر معايه وعرفت ليه الكاشير كان بيندهلي وعمال يتصل وانا في دماغي انه عايز الفلوس
انا واقف قدامها وبدأت أعرق برغم البرد ده وهي بتبصلي ومستغربه مش عارف ابص في وشها من كتر منا محرج
-لقيتها بتقولي حمدلله عالسلامه
= الله يسلمك يافندم
-فين الأكل ؟!
ليه يحصل معايه كده ،انا مافيش حل قدامي غير اني اقول اللي حصل زي ماهو
هي كده كده باظت وانا بوظت الدنيا
= انا بصراحه محرج جدا.. بس لما قالولي ان فيلا 67 اتصلت ركبت المكنه وجيت بسرعه ونسيت اخد الاوردر
يقولها بعشقك يخربيت جمال عيونك.. هي كل ده ساكته ليه ؟! شكلي بوظت الدنيا
فجأة سمعت أحلى صوت في الدنيا
سمعت صوت ضحكتها اللي رن في كل الشارع
صوت ضحكتها اللي لو اعرف انه حلو كده كنت جيت كل مره من غير الاكل
ضحكت وعينيها اضيقت شويه وهي بتضحك ورفعت راسها لفوق وشعرها عمال يطير وانا مش مصدق ان في حد ضحكته بالجمال ده وخدت بالي من لبسها النهارده ماكنتش واخد بالي بسبب التوتر كانت لابسه بنطلون احمر واسع عليه أفيال ولابسه عليه مش عارف البنات بيسموه ايه ؟
بس هو تيشرت وعليه جاكت كت انا مش عارف ايه ده او اسمه ايه بس الطقم حلو وفي حلق رقيق وطويل نازل من ودانها لكتفها وحاطه منكير احمر
بعدها لقيتها بتقولي
-يخربيتك وليه جاي مستعجل كده
-عشان اشوفك
هي موته ولا اكتر.. الجمله طلعت مني من غير ما افكر
لقيتها برقت بعينيها وهي مستغربه وفي احمرار خفيف ظهر على وشها وهي باصه في عيني وانا حاسس اني بتكهرب ومش عايز اشيل عيني من عينيها لحد ما قالتلي
قولتلها لا
قالتلي طب تعالى.. وفتحت باب الفيلا للحظة اتسمرت مكاني وماعرفتش ادخل ولا ارفض
وأرفض ليه ايه الغباوه دي..
دخلت الفيلا وكانت من جوة جميله جدا ديكور وألوان مختاراهم بعنايه وفي لوح كتير غريبه ورسومات جميله وتماثيل في كل حته لقيتها ماشيه قدامي..حتى مشيتها مميزة وتخطف العين..وقفت مره واحده وبصتلي وانا بصيت للسقف بسرعة وشاورتلي على الصالون
دخلت وقعدت عالكنبه وانا مش مستوعب ايه اللي بيحصل وتلفوني عمال يرن الكاشير هيموت نفسه عشان نسيت الاوردر ومستني العشرين جنيه قفلت الموبايل وريحت نفسي
تشرب ايه ؟
لقيتها فجأه واقفه قدامي بطلتها اللي تسحر وريحتها الجميله وبتقولي كمان تشرب ايه ؟
هتجيبيلي حاجه اشربها بنفسك.. انا مش عارف ايه اللي بيحصل هو عادي اللي بعمله ده ولا في حاجه غلط انا حاسس اني متوتر جدا
-دي اكتر جمله بكرها
=خلاص شاي او عصير اللي موجود
-كل حاجه موجوده تشرب ايه ؟
=عصير تفاح
ايه اللي بقوله ده!! ما تقول عصير وخلاص لازم تفاح انت بتتوحم !؟
