ملخص الموضوع ان جه إخبارية
طلعت ملف القضية اقراه....
قعدت اقلب في الورق....
فضلت أقلب في الورق.. ورقة بعد ورقة... لحد ما عيني اتسمرت مكانها.... من كلمة انا اللي كاتبها بخط ايدي في ورقة التشريح..
كدمة دائرية الشكل بقطر ٣ سم بخلفية الرأس لم تؤدي الي حدوث كسور بالجمجمة أو نزيف داخلي ويرجح لي أنها بسبب السقوط علي الأرض....
فضلت أبص للجملة وأفتكر كلام الست الهادئ الواثق عن اخوها اللي ضرب بنتها بفازة في راسها من ورا... معقول ؟
رجعت لورا في الكرسي وانا بضحك... هتشتغل بالأحلام ولا ايه يا ابو حميد
... وهتكتبلهم ايه في التقرير
بحلم بيك انا بحلم بيك
كملت كتابة... دخلت الاستراحة نمت ومفكرتش في شئ... لكن الست كلامها مبيروحش من بالي.....
قومت الصبح... كلمت نيابة اكتوبر... سألت... القضية دي مع مين من البهاوات...
قال مع اسلام بيه... تمام... كلمت اسلام بيه... ايه يا باشا اخبار القضية دي... قاللي متريحش خالص يا دكتور والله...
قلبي بدأ يدق... ليه بس؟
قال الأدلة الجنائية جابت تقرير تكميلي بتقول ان خرطوم الغاز مقطوع بآلة حادة وان الحادث بفعل فاعل...
كأن صاعقة نزلت علي راسي... كمل الكلام... وكمان فيه درج مكسور في دولاب غرفة النوم وعلبة مجوهرات فاضية
و فازة مكسورة... فيه قلق كده....
هو بيتكلم وانا في عالم تاني... تفتكر يا دكتور حد من الاولاد اللي قطع الخرطوم... رديت بسرعة لأ... الاولاد الصغيرين قوتهم اضعف والكبيرة اعقل من انها تعمل كده... قالي عموما هنستني لما أمهم تيجي من الحج وهتحل كل اللغز ده... قولتله امهم جات امبارح وجاتلي المكتب...
قالي مجاتش عندنا... يبقي غالبا هيجيبوها النهاردة...
قولتله طيب انا هروح ابص بصة علي البيت كده انتو سايبين عليه حراسة؟
قال آه طبعا... سلام سلام...
